Saften er viktig for Leikanger – men endå viktigare for heile Sogndal kommune!
Mange i bygda viser no eit stort engasjement for å påverka kommunepolitikarane våre til å stå ved sine tidlegare lovnader om ei full utbygging av Saften. Vi oppmodar alle til å møte opp på protesten utanfor Saften i morgon tysdag 10. desember kl 16, og til å støtte underskriftskampanjen som ligg ute både digitalt og som underskriftslister på papir rundt om i bytikkane i bygda.
Leikangersamfunnet har gledd seg til at det skulle bli noko av utbygginga av den lenge etterlengta storstova for kultur, idrett og folkehelse, møteplassen for sosialt samkome for unge og eldre, vertskapet for forvaltning, offentlege og private arbeidsplassar og lokalt næringsliv som vi har drøymt om. Men så kan det altså plutseleg bli store kutt i planane. No sit lesarinnlegga i Sogn Avis laust, det vert mobilisert på Facebook og i Messengergrupper, og det er starta underskriftskampanje og protestaksjon.
Vi deler her teksten i debattinnlegget som Opplev Leikanger har fått publisert i Sogn Avis idag.
Møte 1 mars 2023: Tage Rickard Sundell (bilde) og Torkjell Solbraa i Sogndal kommune gjekk igjennom skissene, før møtesalen vart omgjort til arbeidsverkstad for dei 100 som hadde møtt opp. Foto: Roar Werner Vangsnes
Saften med sine mange bruksområde har sidan den første ombygginga utvikla seg til å verte den viktigaste samlingsstaden på Leikanger. Saften dekkar heilt nødvendige behov for at lokalsamfunnet skal kunne fungere.
På denne bakgrunn inviterte Opplev Leikanger og Sogndal kommune 1. mars i 2023 til eit ope møte. Tema var: Korleis gjere Saften inne og ute til ein endå viktigare sosial møteplass for framtida. Noko av grunnlaget for møte var også at kommunen var i gang med arbeidet med å lage ein plan for bruken av bygget og arealet rundt.
I møtet var Sogndal kommune ved administrasjonen og den politisk leiinga framoverlente. Saman med over 100 frammøte systrendingar fekk vi til ein god arbeidsverkstad med involvering, engasjement og framtidstru.
Saften er viktig for lokalsamfunnet fordi vi treng å styrke møteplassane, aktivitetane for folk i alle aldrar spesielt unge, eldre og næringslivet i sentrum, der Saften blir rusta opp for framtida i ei bygd med over 2000 innbyggarar.
Saften ligg omkransa av administrasjonen som er av stor betydning for den langsiktige tenkinga i Sogndal kommune som vertskap for statlege og fylkeskommunal administrasjon Foto: Roar Werner Vangsnes
Endå viktigare er Saften for Sogndal kommune. Saften er omkransa av statlege og fylkeskommunale bygg som satsar på Sogndal kommune som administrasjonsstad i Vestland, saman med Bergen. I nærområdet har Vestland fylkeskommune investert ein kvart milliard i oppussing av nytt fylkeshus. Nytt arkivbygg for heile Vestland er under oppføring. I 2025 blir det ombygging av Statens Vegvesen sine lokalar for å gi plass til DigDir som veks ut av sitt gamle bygg. DigDir skal flytte inn i bygget om eit års tid.
Gamle Leikanger kommune var fylkeshovudstad i Sogn og Fjordane. Det er viktig at Sogndal kommune gjer det som trengst for å ta vare på denne posisjonen. Då må kommunen med politikarane i spissen på ein samlande måte tenke strategisk og langsiktig. Det gjer ein best ved å ruste opp Saften no. Saften er nødvendig for kommunen i si vertskapsrolle til statleg og fylkeskommunal administrasjonsstad. Vidare handlar det om god inkludering av tilflyttarar som stadig kjem til kommunen. Det siste for leikangersamfunnet, der eit av hotella er omgjort til asylmottak.
Styret i Opplev Leikanger: Leif Inge Husabø, Roar Werner Vangsnes, Gunn Helen Henne, Birgitte Loftenes Røysum, Arnt Ola Fidjestøl, Emilie Pellegrino. Hilde Njøs var ikkje til stades då biletet vart teke. Foto: Privat
Opplev Leikanger minner difor om at ei utbygging av Saften er noko meir enn ei lokaliseringssak for lokalsamfunnet Leikanger. Det gode forarbeidet som no er gjort for å utvikla Saften til eit framtidsretta bygg for heile kommunen må ikkje stoppa opp fordi politikarar ikkje klarar å sjå kva dei no kan missa i det lange løp.
Desse synspunkta kom tydeleg fram i folkemøtet. Det er viktig at Sogndal kommunestyre legg desse omsyna til grunn når de skal ta stilling til den vidare utbygginga av Saften.
Opplev Leikanger representerer folket på Leikanger. Vi er lokalsamfunnet sin samarbeidsorganisasjon for bulyst,vekst og utvikling. Vi er opptekne av kople saman frivillige lag og organisasjonar, privatpersonar, næringslivet saman med kommunen om aktivitetar og utviklingstiltak.